ພິທີປາຖະກະຖາ ວັນສ້າງຕັ້ງກຳລັງປ້ອງກັນຄວາມສະຫງົບ ຄົບຮອບ 60 ປີ

ສ້າງຂື້ນເມື່ອ ວັນພຸດ, 07 ເມສາ 2021 08:19
ຂຽນໂດຍ ທ້າວ ສອນຫຼ້າ

ພິທີປາຖະກະຖາ ວັນສ້າງຕັ້ງກຳລັງປ້ອງກັນຄວາມສະຫງົບ ຄົບຮອບ 60 ປີ

ຄະນະໂຄສະນາອົບຮົມແຂວງ ສົມທົບກັບຄະນະພັກຄະນະບັນຊາການປ້ອງກັນສະຫງົບແຂວງ ບໍ່ແກ້ວ ຈັດຕັ້ງພິທີປາຖະກະຖາ ເລົ່າມູນເຊື້ອ  ວັນສ້າງຕັ້ງກຳລັງປ້ອງກັນຄວາມສະຫງົບ ຄົບຮອບ 60 ປີ ຂຶ້ນໃນຕອນເຊົ້າຂອງວັນທີ 7 ເມສາ 2021 ຢູ່ທີ່ຫໍວັດທະນະທຳແຂວງ ບໍ່ແກ້ວ, ໃຫ້ກຽດຂຶ້ນເລົ່າມູນເຊື້ອໃນຄັ້ງນີ້ໂດຍ ທ່ານ ພົ.ວ ມະລິສານ ແສງຈັນທາ ອາດີດຮອງເລຂາພັກແຂວງ ອາດີດເລຂາຄະນະພັກ, ອາດີດຫົວໜ້າການເມືອງກອງບັນຊາການທະຫານແຂວງ ບໍ່ແກ້ວ ແລະ ເປັນກຽດ​ເຂົ້າ​ຮ່ວມພິ​ທີ​ປາຖະກະຖາໃນ​ຄັ້ງນີ້ມີທ່ານ  ຈອມສີ ລັດຕະນະປັນ ຮອງເລຂາພັກແຂວງ, ສະມາຊິກສະພາແຫ່ງຊາດເຂດເລືອກຕັ້ງທີ່ 5, ຮອງປະທານ ປ້ອງກັນຊາດ-ປ້ອງກັນຄວາມສະຫງົບ ແຂວງ ບໍ່ແກ້ວ, ມີບັນດາຄະນະປະຈຳພັກແຂວງ, ກຳມະການພັກແຂວງ, ສອງກອງບັນຊາການ​ປກຊ, ປກສ, ຫົວໜ້າ-ຮອງຫົວໜ້າພະແນກການ, ອົງ​ການແນວລາວສ້າງຊາດ, ອົງການຈັດຕັ້ງມະຫາຊົນ, ຕະ​ຫລອດ​ຮອດພະນັກງານ-ສະມາຊິກພັກອ້ອມຂ້າງແຂວງ ບໍ່ແກ້ວ ເຂົ້າ​ຮ່ວມ ທັງໝົດ 600 ກ່ວາສະຫາຍ.

ພິທີປາຖະກະຖາໃນມື້ນີ້ເພື່ອເປັນການຫວນຄືນມູນເຊື້ອແຫ່ງການຕໍ່ສູ້ອົງອາດກ້າຫານ, ມູນເຊື້ອພິລະອາດຫານ ແລະ ໄຊຊະນະໃນພາລະກິດຕໍ່ສູ້ປົດປ່ອຍຊາດ ກໍຄືພາລະກິດປົກປັກຮັກສາ ແລະ ສ້າງສາພັດທະນາປະເທດຊາດ ຂອງກຳລັງປ້ອງກັນຄວາມສະຫງົບປະຊາຊົນ ພາຍໃຕ້ການນຳພາອັນປີຊາສະມັກຂອງພັກປະຊາຊົນປະຕິວັດລາວ, ຖືເອົາການປະຖະກະຖາເລົ່າມູນເຊື້ອວັນປະຫວັດສາດເປັນການເຕົ້າໂຮມຄວາມສາມັກຄີ ແລະ ເພີ້ມທະວີສຶກສາອົບຮົມພະນັກງານ, ສະມາຊິກພັກ, ປະຊາຊົນບັນດາເຜົ່າ ກ່ຽວກັບນ້ຳໃຈຮັກຊາດ, ຮັກລະບອບໃໝ່, ຮັກລະບອບປະຊາທິປະໄຕປະຊາຊົນ, ສ້າງຄວາມສາມັກຄີເປັນປຶກແຜ່ນແໜ້ນໜາ, ສ້າງສະຕິເປັນເຈົ້າຕົນເອງ-ເພິ່ງຕົນເອງ, ຍົກສູງຕໍ່ກົນອຸບາຍທຳລາຍມ້າງເພຂອງອິດທິກຳລັງປໍລະປັກ, ເປັນເຈົ້າການເຂົ້າຮ່ວມ ໃນການປະຕິບັດວຽກງານປ້ອງການຄວາມສະຫງົບທົ່ວປວງຊົນຮອບດ້ານຂອງພັກ ແລະ ເພິ້ມທະວີວຽກງານປ້ອງກັນຄວາມສະຫງົບໃນສະພາບການໃໝ່;

ເພື່ອໂຄສະນາປຸກລະດົມຂະບວນການຈັດຕັ້ງຜັນຂະຫຍາຍມະຕິຂອງກອງປະຊຸມໃຫຍ່ຄັ້ງທີ XI ຂອງພັກ  ແລະ ມະຕິກອງປະຊຸມໃຫຍ່ອົງຄະນະພັກແຂວງ ບໍ່ແກ້ວ ຄັ້ງທີ VI ສຳລັບກຳລັງປ້ອງກັນຄວາມສະຫງົບ ແຂວງ ບໍ່ແກ້ວໃຫ້ສຸມໃສ່ຈັດຕັ້ງປະຕິບັດມະຕິເລກທີ 111 ກົມການເມືອງສູນກາງພັກ ກ່ຽວກັບການເພີ້ມທະວີວຽກງານປ້ອງກັນຄວາມສະຫງົບໃນສະພາບການໃໝ່.