ກອງປະຊຸມສ້າງແຜນກຳນົດພະນັກງານນຳພາ-ຄຸ້ມຄອງຂອງຄະນະໂຄສະນາອົບຮົມແຂວງ ໄລຍະປີ 2021-2025

ສ້າງຂື້ນເມື່ອ ວັນອັງຄານ, 06 ເມສາ 2021 05:20
ຂຽນໂດຍ ທ້າວ ສອນຫຼ້າ

ຄະນະໂຄສະນາອົບຮົມແຂວງ ບໍ່ແກ້ວຈັດກອງປະຊຸມສ້າງແຜນກຳນົດພະນັກງານນຳພາ-ຄຸ້ມຄອງໄລຍະປີ 2021-2025 ຄັ້ງວັນທີ 5 ເມສາ 2021

       ຄະນະໂຄສະນາອົບຮົມແຂວງ ຈັດກອງປະຊຸມສ້າງແຜນກຳນົດພະນັກງານນຳພາ-ຄຸ້ມຄອງໄລຍະປີ 2021-2025 ຂຶ້ນໃນວັນທີ 5 ເມສາ ນີ້ ຢູ່ທີ່ຫ້ອງປະຊຸມຄະນະໂຄສະນາອົບຮົມແຂວງ ໃຫ້ກຽດເປັນປະທານ ຂອງສະຫາຍ ຄອນສະຫວັນ ຊາພັກດີ ກຳມະການພັກແຂວງ, ເລຂາໜ່ວຍພັກ ຫົວໜ້າຄະນະໂຄສະນາອົບຮົມແຂວງ ມີບັນດາແຂກຮັບເຊີນຕະຫຼອກຮອດສະມາຊິກພັກ, ພະນັກງານ-ລັດຖະກອນຄະນະໂຄສະນາອົບຮົມແຂວງເຂົ້າຮ່ວມ ທັງໝົດ 24 ສະຫາຍ ຍິງ 9 ສະຫາຍ.

        ປະທານ ກອງປະຊຸມ ໄດ້ຜ່ານມະຕິວ່າດ້ວຍມາດຕະການຂອງພະນັກງານນຳພາ-ຄຸ້ມຄອງ ສະບັບເລກທີ 030/ກມສພ, ນະຄອນຫຼວງວຽງຈັນ, ລົງວັນທີ 03 ມັງກອນ 2018 ໃຫ້ພະນັກງານ-ສະມາຊິກພັກເພື່ອເປັນບ່ອນອີງໃນການຄົ້ນຄວ້າເລືອກເຟັ້ນເປົ້າໝາຍເຂົ້າໃນແຜນກຳນົດພະນັກງານທີ່ຈະຈັດວາງເຂົ້າໃນຕຳແໜ່ງນຳພາຄຸ້ມຄອງແຕ່ລະຂັ້ນ, ແຕ່ລະຂະແໜ່ງການ, ແນ່ໃສ່ຮັບປະກັນລັກສະນະສືບທອດປ່ຽນແທນຕໍ່ເນື່ອງໃນສະເພາະໜ້າ ແລະ ຍາວນານ, ກະກຽມບຸກຄະລາກອນໃນລັກສະນະເປີດກ້ວາງ ເພື່ອໃຫ້ມີແຫຼ່ງເລືອກເຟັ້ນພະນັກງານນຳພາ-ຄຸ້ມຄອງຕອບສະໜອງທາງດ້ານຈຳນວນ, ຄຸນນະພາບ, ໂຄງປະກອບບຸກຄະລາກອນໃຫ້ຄົບຊຸດຕາມຄວາມຮຽກຮ້ອງຕ້ອງການຂອງບັນດາຕຳແໜ່ງນຳພາ-ຄຸ້ມຄອງແຕ່ລະຂັ້ນ, ແຕ່ລະຂະແໜ່ງການໃນລະບົບການເມືອງ ເປັນການຫັນຍຸດທະສາດກ່ຽວກັບວຽກງານພະນັກງານເປັນອັນລະອຽດ, ເປັນພື້ນຖານໃນການເລືອກເຟັ້ນສ້າງແຜນກຳນົດ, ກໍ່ສ້າງ-ບຳລຸງ, ຄາດຄະເນສັບຊ້ອນ ແລະ ຈັດວາງພະນັກງານຢ່າງສົມເຫດສົມຜົນ.